जम्मू-काश्मीर: डोडा जिल्ह्यात लष्कराच्या तळावर दहशतवादी हल्ला, 1 दहशतवादी ठार

गेल्या अनेक दिवसांपासून जम्मू-काश्मीरमध्ये तणाव वाढला आहे. रियासी आणि कठुआनंतर आता आणखी एक दहशतवादी हल्ला झाला आहे. जम्मू-काश्मीरमधील डोडा जिल्ह्यात लष्कराच्या तात्पुरत्या कार्यरत तळावर दहशतवाद्यांनी गोळीबार केला. यादरम्यान लष्कराचे दोन जवान जखमी झाले. या चकमकीत एक दहशतवादी ठार झाल्याचे वृत्त आहे. यासह एक नागरिक जखमी झाला.

पोलिसांनी मंगळवारी ही माहिती दिली. डोडा जिल्ह्यातील छत्तरगल्ला भागात हा हल्ला झाला. परिसरात शोध मोहीम सुरू करण्यात आली आहे. रियासी आणि कठुआनंतर जम्मू भागात गेल्या तीन दिवसांत झालेला हा तिसरा दहशतवादी हल्ला आहे.

हेही वाचा: जम्मू-काश्मीर: पुलवामामध्ये आयईडी जप्तीची घटना, लष्कर-ए-तैयबाच्या तीन दहशतवाद्यांना अटक

जम्मू एडीजीपी आनंद जैन म्हणाले, "एक दहशतवादी मारला गेला आणि एक नागरिक जखमी झाला, मात्र तो आता धोक्याबाहेर आहे. ऑपरेशन अजूनही सुरू आहे आणि वरिष्ठ अधिकारी घटनास्थळी उपस्थित आहेत."

जम्मू आणि काश्मीरच्या कठुआ जिल्ह्यातील एका घरावर दहशतवाद्यांनी गोळीबार केल्यानंतर सुरक्षा दलांशी झालेल्या चकमकीत एका दहशतवाद्याचा खात्मा झाल्यानंतर काही तासांतच डोडा जिल्ह्यात दहशतवादी हल्ला झाला.

केंद्रीय मंत्री जितेंद्र सिंह यांनी दिलेल्या माहितीनुसार, हिरानगर सेक्टरमध्ये असलेल्या कठुआच्या सैदा सुखल गावात दहशतवाद्यांनी एका घरावर गोळीबार केला. हा भाग आंतरराष्ट्रीय सीमेपासून (IB) जवळ आहे.

एडीजीपी जम्मू यांनी सोशल मीडिया पोस्टमध्ये म्हटले आहे की, "दोडाच्या चत्तरगला भागात लष्कर आणि पोलिसांच्या संयुक्त ब्लॉकने एका दहशतवाद्याला घेरले आहे, गोळीबार सुरू आहे."