जम्मू-काश्मीरमधील राजौरी जिल्ह्यातील नौशेरा सेक्टरमध्ये दहशतवाद्यांचा घुसखोरीचा प्रयत्न फसला आहे. मिळालेल्या माहितीनुसार, संशयित दहशतवाद्यांच्या एका गटाने रात्री भारतीय हद्दीत घुसण्याचा प्रयत्न केला पण ते यशस्वी होऊ शकले नाहीत आणि त्यांना मागे पळून जावे लागले. जेव्हा दहशतवाद्यांनी नियंत्रण रेषेवरून घुसण्याचा प्रयत्न केला तेव्हा लष्कराने गोळीबार केला आणि घुसखोरी करणाऱ्या दहशतवाद्यांना परत जावे लागले.
भारतीय लष्कराने या भागात मोठ्या प्रमाणावर शोध मोहीम सुरू केली आहे.
कठुआ दहशतवादी हल्ला
सोमवारी कठुआमध्ये दहशतवाद्यांनी लष्कराच्या वाहनावर ग्रेनेडने हल्ला केला, ज्यात पाच जवान शहीद झाले. यानंतर लष्कराने संपूर्ण परिसराला वेढा घातला आणि शोध मोहीम सुरू केली. यादरम्यान सुरक्षा दल आणि दहशतवाद्यांमध्ये चकमकही झाली.
सोमवारी लष्करावर झालेल्या दहशतवादी हल्ल्यानंतर घटनास्थळावरून लष्कराच्या वाहनाचेही चित्र समोर आले असून, त्यात गोळीबारामुळे त्याचे नुकसान झालेले दिसत आहे. हल्ल्यानंतर खोऱ्यात लष्कर आणि दहशतवाद्यांमध्ये चकमक सुरूच आहे. सूत्रांनी दिलेल्या माहितीनुसार, टेकडीवर लपलेल्या दहशतवाद्यांनी लष्कराच्या वाहनावर गोळीबार केला आणि लष्कराच्या वाहनावर ग्रेनेडही फेकले. लष्कर आणि दहशतवाद्यांमध्ये चकमक सुरूच आहे. गेल्या काही दिवसांपासून खोऱ्यात अशांतता वाढली आहे. दहशतवाद्यांसोबत चकमकीच्या बातम्या सातत्याने येत आहेत.
दहशतवादी घात घालून बसले होते
अधिकारी घटनास्थळी रक्ताने माखलेले हेल्मेट, बुलेटचे आवरण आणि तुटलेली विंडस्क्रीन असलेली वाहने आणि पंक्चर झालेले टायर यासह पुरावे तपासत आहेत. तसेच जखमी जवानांशी बोलून 8 जुलै रोजी दुपारी काय प्रकार घडला हे समजून घेण्याचा प्रयत्न केला जात आहे. एका अधिकाऱ्याने सांगितले की असे मानले जाते की दहशतवादी तीन लोकांच्या गटात होते आणि त्यांनी दोन वेगवेगळ्या ठिकाणी हल्ला केला आणि वाहने आणि लष्कराच्या जवानांना लक्ष्य केले.
लष्कराने ५,१८९ राऊंड फायर केले
हा जम्मूमधील एका महिन्यातील पाचवा हल्ला असून काश्मीर खोऱ्याच्या तुलनेत तुलनेने शांततापूर्ण भागात झाला आहे. दुपारी साडेतीनच्या सुमारास हा हल्ला सुरू झाला. कठीण शारीरिक आणि मानसिक आव्हानांना तोंड देत असतानाही, भारतीय लष्कराच्या गढवाल रेजिमेंटच्या सैनिकांनी दहशतवाद्यांवर 5,189 राऊंड गोळीबार केला आणि त्यांना घटनास्थळावरून पळून जाण्यास भाग पाडले, असे एका अधिकाऱ्याने वृत्तसंस्थेला सांगितले. जखमी जवानांवर पठाणकोट येथील लष्करी रुग्णालयात उपचार सुरू आहेत. यामध्ये रायफलमॅन कार्तिक सिंगचाही समावेश आहे.