पाकिस्तानमध्ये सौदीच्या प्रवासी विमानाला आग, सर्व 276 प्रवाशांना बाहेर काढले, पाहा VIDEO

पाकिस्तानमधील पेशावर विमानतळावर उतरत असताना सौदी अरेबियाच्या प्रवासी विमानाला आग लागली. आग लागताच सर्व प्रवासी आणि केबिन क्रू मेंबर्सना सुखरूप बाहेर काढण्यात आले.

बुधवारी जेव्हा सौदी एअरलाइन्सचे ७९२ विमान पेशावर विमानतळावर उतरले तेव्हा त्यातून धूर निघताना दिसला. त्यानंतर लगेचच हवाई वाहतूक नियंत्रकाने वैमानिकाला याबाबत माहिती दिली. अग्निशमन व बचाव विभागालाही याबाबत माहिती देण्यात आली. आगीची माहिती मिळताच अग्निशमन दलाच्या गाड्या घटनास्थळी दाखल झाल्या. ही आग तातडीने विझवण्यात आली. विमानातील सर्व प्रवासी आणि कर्मचाऱ्यांना सुखरूप बाहेर काढण्यात आले.

हे विमान सौदी अरेबियातील रियाध येथून पेशावरला आले होते. या विमानात 275 प्रवासी आणि 21 केबिन क्रू मेंबर होते. या घटनेत कोणतीही जीवितहानी झाल्याचे वृत्त नाही.