पंजाबमध्ये आप सरकारचा जनतेला धक्का, पेट्रोल-डिझेलवर व्हॅट वाढवण्याची घोषणा, वीज सबसिडीमध्येही कपात!

पंजाबमधील आम आदमी पक्षाच्या सरकारने जनतेला मोठा धक्का दिला आहे. पंजाब सरकारने पेट्रोल आणि डिझेलवरील मूल्यवर्धित कर (व्हॅट) वाढवला आहे. भगवंत मान यांच्या सरकारने पेट्रोलवरील व्हॅटमध्ये 61 पैशांनी तर डिझेलवर 92 पैशांनी वाढ केली आहे. महसूल वाढवण्यासाठी सरकारने हे पाऊल उचलले आहे.

याशिवाय मंत्रिमंडळाच्या बैठकीत 7 किलो वॅटपर्यंतच्या 600 युनिटपर्यंतच्या वीज जोडण्यांवरील अनुदानही सरकारने रद्द करण्याचा निर्णय घेतला आहे. प्रति युनिट तीन रुपये होते. त्यामुळे लोकांचे मोठ्या प्रमाणावर हाल होणार आहेत.

पंजाब मंत्रिमंडळाच्या बैठकीनंतर अर्थमंत्री हरपाल चीमा यांनी याबाबत माहिती दिली आहे. व्हॅट वाढवून डिझेलवर 395 कोटी रुपये आणि पेट्रोलवर 150 कोटी रुपयांचा महसूल मिळणार असल्याचे त्यांनी सांगितले. व्हॅट वाढीसोबतच हरपाल चीमा यांनी असा युक्तिवाद केला की या वाढीनंतरही हिमाचल, राजस्थान आणि हरियाणापेक्षा पंजाबमध्ये पेट्रोल आणि डिझेलवरील व्हॅट कमी आहे.