देशाची राजधानी दिल्लीतून एक धक्कादायक घटना समोर आली आहे. येथील एका दुकानाच्या छतावर सुमारे 20 वर्षीय तरुणाचा मृतदेह शनिवारी आढळून आला. घटनेची माहिती मिळताच परिसरात खळबळ उडाली. तरूणाची हत्या झाल्याचे सांगण्यात येत आहे. मात्र, हे कोणी आणि कसे केले, याबाबत कोणतीही माहिती मिळालेली नाही.
एका वरिष्ठ पोलीस अधिकाऱ्याने सांगितले की, कोतवाली पोलीस ठाण्याला उत्तर दिल्लीतील चांदनी चौकात रात्री 12.15 च्या सुमारास रक्ताने माखलेला मृतदेह पडल्याची माहिती मिळाली. घटनेची माहिती मिळताच पोलीस पथक तात्काळ घटनास्थळी पोहोचले. तेथे पोहोचल्यावर दुकानाच्या छतावर तरुणाचा मृतदेह पडलेला आढळून आला.
शरीराच्या मानेवर व डोक्यावर अनेक जखमांच्या खुणा होत्या. दगड किंवा धारदार वस्तूने हल्ला केल्याने या जखमा झाल्याचे प्रथमदर्शनी दिसते. अधिकाऱ्याने सांगितले की, या प्रकरणी पोलिसांनी आयपीसीच्या कलम ३०२ (हत्या) अंतर्गत एफआयआर नोंदवला आहे. त्यामुळे या प्रकरणाचा तपास सुरू करण्यात आला आहे.
सध्या या तरुणाची ओळख पटलेली नाही. खुनाच्या घटनेबाबत कोणताही सुगावा मिळण्यासाठी पोलीस आसपासच्या भागातील सीसीटीव्ही फुटेज स्कॅन करत आहेत. यासोबतच पोलिसांनी स्थानिक पातळीवर माहिती देणाऱ्यांनाही सक्रिय केले आहे. हे प्रकरण लवकरच उघड होईल, असे पोलिसांचे म्हणणे आहे.