दिल्लीः मोबाईल हिसकावण्यासाठी तरुणाची हत्या, 2 अल्पवयीन मुलांनी केला गुन्हा

दिल्लीत मोबाईल स्नॅचिंग दरम्यान दोन अल्पवयीन मुलांनी चाकूने भोसकून खून केला. उत्तर-पूर्व दिल्लीतील बुलंद मशिदीजवळ ही घटना घडली. मृताचे वय 32 वर्षे असल्याचे सांगण्यात येत आहे. दोन्ही आरोपी 15 आणि 17 वर्षांचे होते.

अब्दुल कय्युम नावाचा व्यक्ती रविवारी रात्री ८ वाजता बुलंद मशिदीजवळ उभा होता. पोलिसांनी वृत्तसंस्थेला सांगितले की, कय्युम रिक्षा चालवायचा आणि तिथे प्रवाशांची वाट पाहत होता. दरम्यान, दोन्ही मुले त्याच्याजवळ आली आणि त्याच्याकडून मोबाईल हिसकावून घेण्यास सुरुवात केली.

यादरम्यान दोघांनी कय्युमवर चाकूने वार केले. यामुळे त्याला आपला जीव गमवावा लागला. घटनेनंतर कय्युमचा रक्ताने माखलेला मृतदेह बुलंद मशिदीजवळ पडला होता. त्या बाजूने जाणाऱ्या लोकांनी मृतदेह पाहिल्यानंतर पोलिसांना माहिती देण्यात आली.

घटनेची माहिती मिळताच पोलिसांनी घटनास्थळ गाठून घटनेचा तपास सुरू केला. यावेळी पोलिसांनी आजूबाजूच्या परिसरातील सीसीटीव्ही कॅमेरेही तपासले. दोन्ही संशयित सीसीटीव्ही फुटेजमध्ये दिसत होते. त्याआधारे दोघांची ओळख पटवून मध्यरात्री शास्त्री पार्क परिसरातून अटक करण्यात आली.

या दोघांनाही अटक करण्यात आली असून त्यांचा जुना गुन्हेगारी इतिहास तपासण्यात येत असल्याचे पोलीस अधिकाऱ्याने सांगितले. या दोघांचा अन्य कोणत्या प्रकरणात सहभाग आहे का, याचा शोध घेतला जात आहे.