तमिळनाडूतील तिरुचिरापल्ली येथे रेल्वे प्रवाशाकडून सोन्याचे दागिने आणि मोठी रोकड सापडली आहे. रेल्वे सुरक्षा दलाने प्रवाशाकडून 1.89 कोटी रुपयांचे सोन्याचे दागिने आणि 15 लाख रुपयांची रोकड जप्त केली आहे. 'ऑपरेशन व्हिजिलंट' अंतर्गत प्रतिबंधित वस्तूंची अवैध वाहतूक, प्रवाशांच्या सामानाची चोरी यासारख्या गुन्ह्यांचा नियमित तपास करणाऱ्या आरपीएफच्या पथकाने बुधवारी एका प्रवाशाला संशयाच्या आधारे ताब्यात घेतले.
अटक करण्यात आलेल्या व्यक्तीचे नाव आर लक्ष्मणन असे आहे, जो चेन्नई एग्मोरहून तिरुचिरापल्ली येथे चेन्नई एग्मोर-मंगळुरु एक्स्प्रेसने आला होता.
अधिका-यांनी त्याच्या खांद्यावर लटकवलेली काळी पिशवी तपासली असता, त्यामध्ये त्यांना आणखी एक बॅग सापडली, ज्यामध्ये 15 लाख रुपये रोख आणि 2796 ग्रॅम सोन्याचे दागिने होते, ज्याची किंमत अंदाजे 1.89 कोटी रुपये होती. जप्त केलेल्या मालाची एकूण किंमत सुमारे 2.04 कोटी रुपये आहे.
लक्ष्मणनने या वस्तूंची बेकायदेशीररीत्या रेल्वेने मदुराई येथे वितरणासाठी वाहतूक केल्याचे अधिक तपासात समोर आले. जप्त केलेली रोकड आणि सोने पुढील तपासासाठी आयकर विभागाकडे सोपवण्यात आले.