झारखंड: JMM कार्यकर्त्याची हत्या करणारा कुख्यात गुन्हेगार चकमकीत ठार

झारखंडच्या रामगड जिल्ह्यात शनिवारी एका मोठ्या कारवाईत पोलिसांनी कुख्यात गुन्हेगार राहुल तुरी उर्फ आलोक याला चकमकीत ठार केले. रामगड जिल्ह्यातील कुजू चौकी भागातील मुरपा गावात ही चकमक झाली.

वृत्तसंस्थेच्या वृत्तानुसार, रामगडचे पोलीस अधीक्षक अजय कुमार यांनी सांगितले की, ही चकमक रामगढ आणि हजारीबाग पोलीस दलाच्या संयुक्त कारवाईदरम्यान झाली. पोलिसांनी गुन्हेगाराला आत्मसमर्पण करण्यास सांगितले, मात्र त्याने पोलिसांवर गोळीबार केला. प्रत्युत्तरादाखल राहुल तुरीला गोळी लागली आणि त्याचा मृत्यू झाला.

JMM कार्यकर्त्याच्या हत्येत सामील होता

झारखंड मुक्ती मोर्चा (जेएमएम) नेते संतोष सिंह यांच्या हत्येत राहुल तुरीचा हात असल्याची माहिती हजारीबागचे एसपी अरविंद कुमार सिंह यांनी दिली. ८ जानेवारी रोजी उरीमरी पोलीस ठाण्याच्या हद्दीतील न्यू बिरसा कोलरी प्रकल्प परिसरात ही हत्या करण्यात आली होती. एसपी अरविंद कुमार सिंह यांनी सांगितले की, या प्रकरणाचा तपास करण्यासाठी बरकागाव उपविभागीय पोलीस अधिकारी पवन कुमार यांच्या नेतृत्वाखाली विशेष तपास पथक (एसआयटी) तयार करण्यात आले आहे.

या चकमकीनंतर पोलिसांनी राहुल तुरीच्या एका साथीदारालाही अटक केली आहे. मात्र, अद्याप त्याची ओळख पटलेली नाही. राहुल तुरी उर्फ आलोक हा झारखंडमधील अनेक जिल्ह्यांमध्ये कुख्यात गुन्हेगार म्हणून ओळखला जात होता. खून, दरोडा आणि इतर गंभीर गुन्ह्यांमध्ये त्याचा सहभाग होता. संतोष सिंगच्या हत्येनंतर पोलीस त्याचा शोध घेत होते.