शिवराज यांना कृषी मंत्रालय, खट्टर यांना ऊर्जा मंत्रालय... मोदी 3.0 मध्ये माजी मुख्यमंत्र्यांना काय मिळाले?

पंतप्रधान नरेंद्र मोदी यांच्या नवीन मंत्रिमंडळात सहा माजी मुख्यमंत्री कॅबिनेट मंत्री आहेत. मध्य प्रदेशचे माजी मुख्यमंत्री शिवराज सिंह चौहान यांच्याकडे केंद्रीय कृषी मंत्रालय, तर हरियाणाचे माजी मुख्यमंत्री मनोहर लाल खट्टर यांच्याकडे ऊर्जा आणि शहरी व्यवहार मंत्रालयाची जबाबदारी देण्यात आली आहे. हिंदुस्थानी अवाम मोर्चाचे (एचएएम) नेते बिहारचे माजी मुख्यमंत्री जीतन राम मांझी यांच्याकडे केंद्रीय सूक्ष्म, लघु आणि मध्यम उद्योग (एमएसएमई) मंत्रालयाचा कार्यभार सोपवण्यात आला आहे. उत्तर प्रदेशचे माजी मुख्यमंत्री राजनाथ सिंह संरक्षण मंत्री राहतील.

आसामचे माजी मुख्यमंत्री सर्बानंद सोनोवाल यांची पंतप्रधान नरेंद्र मोदी यांच्या नवीन मंत्रिमंडळात बंदरे, जहाजबांधणी आणि जलमार्ग मंत्री म्हणून नियुक्ती करण्यात आली आहे. जेडीएस नेते आणि कर्नाटकचे माजी मुख्यमंत्री एचडी कुमारस्वामी यांना अवजड उद्योग आणि पोलाद खात्याची जबाबदारी देण्यात आली आहे.

अमित शहा गृहमंत्री, निर्मला सीतारामन पुन्हा अर्थमंत्रालय

दरम्यान, अमित शहा गृहमंत्री आणि सहकार मंत्रीपदी कायम राहणार आहेत. नितीन गडकरी यांच्याकडे रस्ते वाहतूक आणि महामार्ग मंत्रालय कायम आहे. निर्मला सीतारामन यांच्याकडे पुन्हा एकदा अर्थ मंत्रालय आणि कॉर्पोरेट व्यवहार मंत्रालयाची जबाबदारी देण्यात आली आहे.

जेपी नड्डा यांना आरोग्य आणि कुटुंब कल्याण मंत्रालय

भाजपचे प्रमुख जेपी नड्डा यांना आरोग्य आणि कुटुंब कल्याण मंत्रालय देण्यात आले आहे. एस जयशंकर परराष्ट्र मंत्रालयात परत आले आहेत, तर पीयूष गोयल यांना वाणिज्य आणि उद्योग मंत्रालय मिळाले आहे. अश्विनी वैष्णव रेल्वे मंत्री राहतील आणि त्यांना माहिती आणि प्रसारण मंत्रालय आणि इलेक्ट्रॉनिक्स आणि माहिती तंत्रज्ञान मंत्रालयाची जबाबदारी देण्यात आली आहे.

प्रल्हाद जोशी यांच्याकडे ग्राहक व्यवहार, अन्न आणि सार्वजनिक वितरण आणि नवीन आणि नवीकरणीय ऊर्जा मंत्रालय, तर ज्योतिरादित्य सिंधिया यांना पूर्वोत्तर क्षेत्र विकास मंत्रालय देण्यात आले आहे.

हरदीप सिंग पुरी यांना पेट्रोलियम मंत्रालय: हरदीप सिंग पुरी हे त्यांच्या जुन्या मंत्रालयाच्या जबाबदाऱ्याही सांभाळताना दिसणार आहेत. यापूर्वीही त्यांच्याकडे पेट्रोलियम मंत्रालय होते. याशिवाय ते मोदी सरकारमध्ये विमान वाहतूक मंत्रीही राहिले असून नगरविकास मंत्रालयाचे पदही त्यांनी भूषवले आहे.

सीआर पाटील यांच्याकडे जलशक्ती मंत्रालयाची जबाबदारी देण्यात आली आहे. तर धर्मेंद्र प्रधान यांच्याकडे शिक्षण विभागाची जबाबदारी देण्यात आली आहे. जेडीएसचे कुमारस्वामी यांना अवजड उद्योग आणि पोलाद मंत्री करण्यात आले आहे.