पाकिस्तान: ईशनिंदा केल्याच्या आरोपावरून एका व्यक्तीची हत्या, संतप्त जमावाने पोलीस स्टेशनही जाळले

पाकिस्तानातील खैबर पख्तुनख्वा प्रांतातील मदायन येथून एक धक्कादायक प्रकरण समोर आले आहे. येथे गुरुवार, 20 जून रोजी संतप्त जमावाने पोलिस ठाण्यात घुसून तेथे असलेल्या एका व्यक्तीला जबरदस्तीने बाहेर काढले. यानंतर संतप्त जमावाने ईशनिंदेच्या आरोपाखाली त्यांची हत्या केली.

वृत्तसंस्था एपीच्या वृत्तानुसार, स्थानिक पोलीस अधिकारी रहीम उल्लाह यांच्या म्हणण्यानुसार, हल्लेखोरांनी खैबर पख्तुनख्वा प्रांतातील मदायन शहरातील पोलीस स्टेशनलाही आग लावली आणि तेथे उभ्या असलेल्या पोलिसांच्या गाड्या जाळल्या.

पोलिसांनी सांगितले की, जमावाने मारलेल्या व्यक्तीचे नाव मोहम्मद इस्माईल असून तो शहरातील एका हॉटेलमध्ये थांबलेला पर्यटक होता. काही स्थानिक लोकांनी त्याच्यावर हल्ला केला आणि त्याच्यावर ईशनिंदेचा आरोप केला.

रहिम उल्ला यांनी सांगितले की, पोलिस अधिकाऱ्यांनी त्या व्यक्तीला त्याच्या सुरक्षेसाठी पोलिस ठाण्यात नेले. मात्र गर्दी वाढून त्यांचा पाठलाग सुरू झाला. यानंतर जमावाने स्टेशनवर हल्ला केला. एवढेच नाही तर जमावाने आरोपी इस्माईलला पोलिसांकडून हिसकावून घेत, मारहाण करून ठार मारले आणि नंतर त्याचा मृतदेह जाळून रस्त्यावर टाकून दिला.

पोलीस अधिकारी रहीम उल्लाह यांनी सांगितले की, परिस्थिती नियंत्रणात आणण्यासाठी अतिरिक्त पोलीस दल मद्यान येथे पोहोचले आहे. ते म्हणाले की, परिसरात मोठ्या प्रमाणात पोलीस बंदोबस्त तैनात करण्यात आला आहे. पोलिसांनी जमावाला पांगवले आहे. आजूबाजूला शांतता राहावी यासाठी पोलिसांची तुकडी संचलन करत आहे.

मात्र, हल्लेखोरांपैकी कोणाला अटक करण्यात आली आहे की नाही हे अद्याप समजू शकलेले नाही. गेल्या महिन्यात, पाकिस्तानच्या पूर्व पंजाब प्रांतात जमावाने ईशनिंदा केल्याच्या आरोपावरून नाझीर मसिह या ७२ वर्षीय ख्रिश्चन व्यक्तीवर हल्ला केला. नंतर रुग्णालयात त्यांचा मृत्यू झाला.